Vlerë milionëshe për Celinën, Zeneli më i shtrenjti

Vlera e futbollistëve të përfaqësueses së Kosovës, dita-ditës po rritet.

Sipas rifreskimit të fundit që u bë sot nga faqja e njohur Transfermarkt.com, vlera e dy futbollistëve që po shkëlqejnë në Holandë, Bersant Celinës dhe Arbër Zenelit, është rritur dukshëm.

Borozani.com ka bërë krahasimin e vlerave të reja me ato të mëparshme të futbollistëve kosovarë në Holandë, ku pikërisht dyshja Celina-Zeneli bie menjëherë në sy.

Celina, i cili deri dje nuk kishte fare çmim nga faqja Transfermarkt.com, menjëherë e ka rritur vlerën e tij në 1.5 milionë euro, derisa Zeneli, që deri dje vlerësohej për 2 milionë euro, nga sot e ka rritur çmimin e tij në 3.5 milionë euro, duke u bërë kështu futbollisti më i shtrenjtë në përfaqësuesen e Kosovës.

Dy futbollistët e tjerë nga Kosova që po luajnë në Holandë, Milot Rashica (2.75 mln €) dhe Sinan Bytyqi (0.5 mln €) kanë ruajtur çmimin e tyre sikurse që e kanë pasur më parë.