LLAMKOSI KAMPION
Foto: Alfred Imeri
Vushtrria feston, Llamkosi kampion
24 May, 2014 @18:28
Megjithëse ka mbetur edhe një javë deri në përfundim të Superligës së Kosovës në futboll, tashmë është mbyllur dilema e kampionit.
Skuadra nga Vushtrria, Llamkos Kosova, ka dalur si kampion nga qyteti i Skenderajit, pasi shënoi fitore me rezultat 1-3 ndaj Drenicës.
Goli i parë i ndeshjes u shënua nga skuadra e Drenicës me anë të Granit Arifajt, i cili shënoi me kokë në minutën 28’, e që ky ishte edhe goli i vetëm i pjesës së parë.
Me të filluar pjesa e dytë, filloi edhe dominimi i plotë i Llamkosit.
Në minutën e dytë të kësaj gjysmëloje u barazua rezultati në 1-1 me anë të Dior Zabërgjës. Dhjetë minuta më vonë Bashkim Shala e kaloi në epërsi skuadrën e tij.
Ky i fundi pati gisht edhe në golin e tretë të vushtrriasve, pasi ishte asistues në golin e Milot Rashicës.
Ky është titulli i parë i Llamkos Kosovës në histori të klubit.
Rezultatet dhe tabela aktuale.
