Ante Cacic: Kosova, detyrë e vështirë

Selektori kroat, Ante Cacic, duke folur për mediat kroate para ndeshjes ndaj Kosovës, ka thënë se ekipin e tij e pret një detyrë e vështirë.

Derisa mediat kroate e kanë pyetur direkt për 6 pikë nga dy ndeshjet e tetorit në kuadër të kualifikimeve, Cacic është përgjigjur.

“Ndeshja e parë është shumë me rëndësi, ndërsa për Finlandën do të mendojmë pasi që të kryejmë ndeshjen në Shkodër ndaj Kosovës,” ka thënë fillimisht selektori kroat për të vazhduar.

“Unë personalisht besoj te djelmoshat tanë. Kjo është ndeshja e parë e kosovarëve si vendas, ndërsa atmosfera në stadium pritet të jetë e zjarrtë dhe besomëni na pret një detyrë e vështirë këtu. Sidoqoftë, ne jemi me më shumë përvojë dhe më cilësor - por këtë duhet ta tregojmë në fushë,” përshkruan Sportske Novosti fjalët e selektorit kroat.