Armenët dhe serbët, vlerësojnë grupin e vështirë

Pas tërheqjes së shortit për kualifikimet në Kampionatin Europian të futbollit 2016 që do të mbahet në Francë kanë ardhur deklaratat e para të kundërshtarëve në Grupin I, ku bën pjesë edhe Shqipëria. 

Kuqezinjtë kanë qëlluar në një grup të vështirë, me kundërshtarë si Portugalia, Danimarka, Serbia dhe Armenia, ku Shqipëria është si kandidatja më e dobët sipas renditjes së UEFA-së. 

“Nuk do të jetë grup i lehtë, mirëpo këtë gjë do ta thonë të gjithë kundërshtarët. Jam i sigurt se çdo rival do të luftojë për të arritur sa më lartë është e mundur në tabelë,” ka thënë portieri i Armenisë, Roman Berezovsky, për faqen zyrtare të UEFA-së pas tërheqjes së shortit. 

Edhe rivali që pritet të ketë një luftë speciale në fushë, Serbia ka thënë se grupi është tejet i vështirë, duke cekur vitet e tij të kaluara në Portugali që është edhe favoritja në letër e grupit. 

“Kam kaluar gati një dekadë në Portugali si lojtar dhe tani do t’i kemi ata kundërshtarë në grup. Grupi ynë është  i vështirë,” ka thënë Ljubinko Drulovic, i cili tani kryen detyrën e njërit prej stafit të trajnerëve në përfaqësuesen serbe. 

Ndeshja ndërmjet Shqipërisë dhe Serbisë pritet të kalojë në atmosferë të zjarrtë, derisa ylli i grupit Cristiano Ronaldo siguron stadiumet e stërmbushura në të gjitha ndeshjet. 

Këtu mund t’i shihni të gjitha grupet pas shortit të tërhequr sot në Nice për EURO 2016.