AS: Kosova s’luan nëse Spanja nuk respekton rregullat bazë të UEFA-së

Pas publikimit të komunikatës së djeshme të Federatës së Futbollit të Spanjës që ka quajtur Kosovën territor, do t’ia cilësojë Kosovës himnin si këngë dhe thyerje tjera të protokollit të UEFA-së dhe reagimit të ashpër të FFK-së, AS ka publikuar kërcënimin e FFK-së sot.

“Kosova nuk do të luajë ndaj Spanjës nëse Spanja nuk i respekton rregullat bazë të protokollit të UEFA-së,” ka shkruar Diario AS.

AS gjithashtu ka cekur kërkesat e rregullta të FFK-së ku ka theksuar se nëse flamuri, himni dhe emërtimi nuk lejohen, Kosova nuk do të pranojë këtë lloj diskriminimi dhe nuk do të zhvillojë ndeshjen.

Më pas AS ka shpjeguar çështjen e Kosovës dhe pse Spanja nuk e njeh shtetin e Kosovës, duke theksuar si arsye kryesore “konfliktin katalonas”. “Për këtë arsye Qeveria spanjolle e konsideron Kosovën pjesë të Serbisë, për shkak të ngjajshmërive mes dy çështjeve,” ka theksuar ndër të tjera gazeta.

Kujtojmë, më parë Kosova ka luajtur hendboll në Spanjë ku vendasit u detyruan nga EHF të respektojnë krejt rregullat e parapara, ndërsa UEFA-ja kishte dënuar me mosorganizim të garës për U19 në futboll spanjollët, duke ia dhënë organizimin Zvicrës, kur iberikët s’kishin pranuar kushtet elementare për pjesëmarrje të një shteti në sport: himni, flamuri, shteti.

Gjithashtu gazeta ka cekur edhe një fjalim të ish-kryetarit dhe ish-kryeminstrit të Kosovës Hashim Thaçi nga viti 2018, ku ai kishte thënë: Spanja nuk është Serbi e Katalonia nuk është Kosovë.

Në fakt kërkesa e Kosovës, në këtë rast FFK-së, është krejtësisht legjitime pasi që këto janë rregulla bazë të UEFA-së për një ndeshje ndërkombëtare. Ndërsa Federata e Spanjës në anën tjetër ka rënë pre e politikës së saj.