Baftiu shkëlqen, Ballkani pret gabimin e Dritës!

Siç edhe pritej, me fitore të suharekasve është mbyllur dueli mes Dukagjinit dhe Ballkanit në Klinë.

Skuadra e drejtuar nga Ismet Munishi takimin e sotëm e mbylli me fitore 1-5 (Granit Elezaj 86’ - Blend Baftiu 23’, 47’ (P), 73’ (P), Ermal Krasniqi 61’, Artur Magani 82’) për ta vazhduar kështu garën për titull.

TABELA AKTUALE

E te Ballkani sot ishte dita e Blend Baftiut.

Baftiu, që po kalon një super-sezon, fillimisht me një supergol nga goditja e dënimit (23’) ia dha epërsinë fillestare Ballkanit, ndërsa gjatë pjesës së dytë u tregua edhe dy herë i saktë nga pika e bardhë (47’, 73’), për ta mbyllur kështu ndeshjen me hat-trick.

Përveç Blendit, në listën e golashënuesve të Ballkanit sot u futën edhe Ermal Krasniqi, që me të majtën e gjeti rrjetën në minutën e 61’ të ndeshjes dhe Artur Magani, që shënoi me kokë (82’).

E tëra çfarë bëri Dukagjini sot ishte një gol i nderit, që erdhi përmes Granit Elezajt pak para fundit (86’).

Dukagjini sezonin tjetër tashmë dihet që do të garojë në Ligën e Parë, kurse Ballkani, me një ndeshje më shumë të luajtur, i është afruar Dritës në 2 pikë dhe shpreson në gabimin e saj në ndeshjen e nesërme ndaj Llapit në Podujevë. Kuptohet, përveç Ballkanit e Dritës, në garën tejet të ngushtë për titull ndodhen edhe Gjilani e

Prishtina, të cilat këtë xhiro shënuan fitore në ndeshjet përkatëse.