DUKAGJINI - BALLKANI
Ballkani barazon në Klinë, merr kreun
20 October, 2021 @15:04
Pa gola dhe pa fitues është mbyllur dueli i sotëm mes Dukagjinit dhe Ballkanit në Klinë.
Rezultati i arritur në këtë takim bën që Ballkani të ngjitet në krye të klasifikimit, pasi që Drenica u mposht në Gjilan sot, kurse Dukagjini momentalisht është në zonën e rrezikshme.
Pjesa e parë mes skuadrave kaloi me porta të paprekura. Dominimi ishte më tepër në anën e Ballkanit, por portat nuk u prekën dhe skuadrat shkuan në pushim me rezultat të bardhë.
Edhe gjatë pjesës së dytë, raste për shënim kishte, por gola përsëri nuk pamë. Një prej arsyeve kryesore që këtë ndeshje rrjetat nuk u tundën ishte edhe disponimi i Kenan Haxhihamzës, portierit vendas, i cili zhvilloi një paraqitje mjaft të mirë, duke ia mohuar golin mysafirëve në disa raste.
Xhiron e ardhshme, Dukagjini i shkon Drenicës në “Bajram Aliu”, kurse Ballkani luan në Suharekë ndaj Prishtinës.
