EINTRACHT FRANKFURT - BAYERN MUNCHEN
Bayerni ndalet në Frankfurt
15 October, 2016 @17:28
Bayern Munchen ka humbur pikë në ndeshjen e dytë rresht në Bundesliga.
Pas barazimit në xhiron e kaluar me Kolnin, bavarezët edhe këtë javë u desh të kënaqen me një pikë, pasi barazuan me rezultat 2-2 me Eintracht Frankfurtin e Shani Tarashajt.
Goli i parë erdhi nga Arjen Robben, i cili shënoi në minutën 10’, ndërsa në pushim skuadrat shkuan pranë rezultatit 1-1, pasi mesfushori hungarez, Szabolcs Huszti, e barazoi rezultatin.
Ky i fundit e përfundoi takimin para kohe, duke u ndëshkuar me kartonin e dytë të verdhë dhe më pas edhe me të kuqin, për ta lënë skuadrën vendase me një lojtar më pak, derisa para kartonit të kuq Bayerni kishte kaluar në epërsi me golin e mesfushorit të talentuar Joshua Kimmich.
Por deri në fund bavarezët nuk arritën ta ruajnë epërsinë në rezultat dhe as nuk ditën ta shfrytëzojnë epërsinë e një lojtari më shumë në fushë, pasi me golin e meksikanit Fabian, ndeshja përfundoi me rezultat 2-2.
Në këtë ndeshje për Eintrachtin luajti edhe Shani Tarashaj, i cili u aktivizua nga minuta 70’.
