Brenda 10 ditësh, dy herë në Elbasan Arena

Vetëm disa ditë më parë, përkatësisht më 7 shtator, mesfushori ofansiv i Portugalisë, Ricardo Quaresma, së bashku me përfaqësuesen portugeze, kishin zbarkuar në Elbasan Arena për ndeshjen e rëndësishme për kualifikimet në kampionatin europian ndërmjet Shqipërisë dhe Portugalisë.

Në këtë ndeshje Quaresma ishte inkuadruar në lojë nga minuta 65’, ndërsa korneri i krosuar nga ai në minutat shtesë përfundoi në portë, që dha fitoren me rezultat minimal Portugalisë.

Tani, vetëm dhjetë ditë më vonë, Quaresma do të jetë i pranishëm përsëri në stadiumin Elbasan Arena, por kësaj radhe me fanellën e skuadrës së tij, Besiktas, që do të jetë mysafire e kampionit shqiptar, Skenderbeut, në kuadër të Europa League.

Quaresma nuk do të ndjehet i huaj në Elbasan Arena, pasi që ende kujton momentet e disa ditëve më parë që i kishte kaluar në këtë stadium.

Ndeshja ndërmjet Skenderbeut dhe Besiktasit luhet të enjtën më 17 shtator nga ora 21:05.