Challandes paksa i frikësuar

Para dy miqësoreve të radhës, ndaj shteteve afrikane, selektori Bernard Challandes sa është i kënaqur dhe i entuziazmuar, aq është edhe i frikësuar.

Kështu së paku ka thënë vetë zvicerani për faqen zyrtare të FFK-së nga Antalya e Turqisë, ku Kosova ka kryer sot përgatitjet e fundit para ndeshjes me Guinenë. E sa për kujtim, Guinea ka barazuar pa gola me Turqinë ditë më parë, derisa këta të fundit po bënin përgatitjet për evropian.

Ekipi i përzier dhe mungesa e shumë lojtarëve kyq, ka bërë që Challandes të thërret për këtë ndeshje një ekip eksperimental, ku të rinjtë pritet të tregojnë veten.

“E kemi nisur këtë kamp stërvitur për dy ndeshjet e radhës, me një ekip krejtësisht të ri. Nuk ishte aspak lehtë të gjenim lojtarët për këto ndeshje në këtë kohë. Disa lojtarë në pushim, disa e kanë përfunduar kampionatin para tri javësh. Kemi lojtarë me U21, kurse disa të tjerë që po përgatiten me ekipet e tyre për kupat evropiane. Nuk ishte aspak lehtë të ndërtojmë një ekip. Por, jam shumë i lumtur që lojtarët po ndiejnë kënaqësi që janë këtu. Kanë bërë punë të mirë, kanë treguar mentalitet të mirë. Ky ekip kurrë nuk ka luajtur së bashku, nuk është lehtë të gjendet lidhja menjëherë. Por, janë lojtarë të ri dhe ata janë të mirë dhe ne jemi munduar të bëjmë më të mirën me tri stërvitje,” ka thënë fillimisht Challandes për të vazhduar.

“Do të luajmë kundër dy ekipeve të forta nga Afrika. Guinea është në Top 20 në Afrikë dhe ka luajtur ndeshje të mirë me Turqinë 0:0. Kundërshtar i fortë, fizikisht, teknikisht e taktikisht. Për lojtarët tanë të rinj është një përvojë e vështirë, por ne mund të mësojmë nga situatat e tilla. Do të jetë mirë t’i shohim lojtarët në situata të tilla dhe të japim një përgjigje si ekip sepse individualisht nuk është aspak e lehtë. Shpresoj që ekipi të luftojë, të tregohet si kundërshtar i fortë. Jam paska i frikësuar, por edhe i kënaqur. Kemi lojtarë të rinj për të ardhmen, të cilët do t’i shohim. Ju kam thënë se duhet të luajnë për ekipin dhe për të ardhmen e tyre. Do të ketë shumë skautë këtu dhe ndoshta mund ta shohin një lojtarë nga Kosova. Pishman jam vetëm për kohën sepse ishte e vështirë të gjenden lojtarët në formë fizike menjëherë pas pushimeve. Ndeshjet e forta fizike mund të jenë të rrezikshme, por ne jemi munduar të bëjmë përgatitjet e duhura për këto dy ndeshje. Besoj se jemi të gatshëm dhe këtë do ta tregojmë në fushë,” ka përfunduar përzgjedhësi i Kosovës.

Kosova në qershor shënoi 2 fitore në 2 miqësoret e zhvilluara. Të parën e fitoi ndaj San Marinos 4-1, ku të gjitha golat për Dardanët i shënoi Vedat Muriqi. Të dytën e fitoi 2-1 ndaj Maltës, ku të gjitha golat për Dardanët i shënoi Milot Rashica. Të dy mungojnë në këto ndeshje.

Kosova - Guinea zhvillohet nesër me fillim prej orës 16:00 me kohën tonë.