Daja rendit fitoret, Ballkani lider 3/3

Prej ardhjes së Ilir Dajës në krye të ekipit, Ballkani po rendit fitoret. Skuadra suharekase ka arritur edhe fitoren e tretë në tre ndeshjet e para të pjesës pranverore të stinorit dhe këtë bilanc nuk e ka asnjëra skuadër tjetër e Superligës në pranverë.

Suharekasit kanë marrë nëntë pikë nga nëntë të mundshme, duke e ruajtur kreun e renditjes tabelare së paku deri në xhiron e radhës, kur i pret derbi i madh ndaj njërit nga ndjekësit në luftë për titull, Drita.

Fundi i pjesës së parë ka qenë fatal për Ulpianën mysafire të Ballkanit sot, pasi që në pesë minutat e fundit të ndeshjes vendasit shënuan jo një, por dy herë për të shkuar qetë në pushim dhe thuajse me fitore në xhep.

TABELA AKTUALE E SUPERLIGËS

Ka qenë kapiteni Edvin Kuc që ka shënuar për epërsinë e suharekasve, ndërsa asistuesi i tij Blend Baftiu ka shënuar tre minuta më vonë kur pranoi topin nga Armend Thaqi për 2-0 të 45-minutave të para lojë.

Në pjesë të dytë, gjërat u vështirësuan edhe më tepër për ekipin e drejtuar nga Edlir Tetova, pasi që Egzon Qerimi u ndëshkua me karton të kuq (49’). Gjithsesi, Ulpiana provoi disa herë, por Stivi Frashëri në portë të Ballkanit, ishte i pakalueshëm.

E 15-minuta para fundit të ndeshjes ka qenë gjakovari Mevlan Zeka që u përkujdes për epilogun e takimit, duke shënuar për 3-0 [Edvin Kuc 41, Blend Baftiu 44, Mevlan Zeka 75] përfundimtare, që e mban Ballkanin në krye të renditjes tabelare të Superligës.