Depay hattrick, hakmarrje e rëndë e tulipanëve

Në datën e sotme, një vit më parë, në start të kualifikimeve për Botërorin e Katarit, Turqia dilte fituese ndaj Holandës 4-2. Futbollistët e drejtuar nga Senol Gunes fluturonin nga gëzimi, derisa holandezët kokulur dilnin nga stadiumi.

Prej asaj dite, deri më sot, Turqia ishte e para në renditjen e Grupit G kualifikues për Botërorin e Katarit. Nga sonte, ajo është e treta në grup dhe me ecurinë që po tregon, gjasat vetëm se po i zvogëlon.

Holanda që para shtatorit emëroi Luis Van Gaalin në krye të kombëtares, ka shkëlqyer sonte ndaj turqve të humbur në fushë, duke i çmontuar me lojë për fitoren me 6-1 [Klaasen 1, Depay 16, 38, 54, Tiol 80, Malen 90 - Under 90+2] dhe për të marrë kreun e grupit.

TABELA AKTUALE dhe ORARI I NDESHJEVE

Memphis Depay ka shënuar hattrickun e parë me kombëtaren tulipane sonte, ndërsa ai tashmë është futur në TOP 10 golashënuesit më të mirë të kombëtares dhe ka vetëm 18 gola më pak se i pari në renditje, Robin Van Persie (50).

Përndryshe, kjo është humbja më e thellë e Turqisë në kualifikime për Botëror qysh prej vitit 1984, kur ishin mposhtur nga Anglia 8-0.