Derbi tiranas, i takoi Partizanit

I mbushur dukej stadiumi derisa futbollistët e të dyja skuadrave filluan defilimin e tyre nëpër tepihun e gjelbër të Qemal Stafës. 

Ndeshja u përshkrua nga një rivalitet i madh sportiv në fushë, derisa edhe referi ishte në nivel të detyrës së tij, ku portierët Stivi Frashëri i Tiranës dhe Alban Hoxha i Partizanit, patën shumë punë sonte. 

Në një atmosferë të zjarrtë, Partizani ka dalë fitues në derbin e madh të kryeqytetit të Shqipërisë, duke e mposhtur Tiranën 2-1. 

Kapteni maestral i Partizanit, Nderim Nexhipi, ka shënuar golin e parë të skuadër pas asistimit nga serbi Stevan Racic, derisa ky i fundi pak më vonë u përkujdes që të shënojë për 2-0, kur topin e shutuar fortë nga ish lojtari i Prishtinës, Mentor Mazrekaj e dëboi portieri i Tiranës, Stivi Frashëri. 

Tirana u këndell në pjesë të dytë, kur Mario Morina uli epërsinë e Partizanit me golin e tij, por deri në fund të ndeshjes djelmoshat e Gugash Maganit nuk arritën të shënojnë edhe njëherë, përkundër se kishin rastet. 

Në fund, Partizani doli fitues për të kapur me pikë Tiranën në tabelë pasi që tashmë me fitoren e verdhekuqëve të dyja skuadrat kanë nga 50 pikë në klasifikim të Kategorisë Superiore. 

Kjo ka qenë fitorja e tretë e Partizanit të drejtuar nga Shpëtim Duro në katër xhirot e fundit të Superiores shqiptare. 

Lider vazhdon të mbetet Skënderbeu kampion me 54 pikë, para Kukësit që ka 50 pikë. 

Video

Golat nga derbi Tirana-Partizani