Do ta lë Chelsean

Trajneri spanjoll të Chelseat, Rafael Benitez, i ka ardhur në maje të hundës mospërkrahja nga tifozët, të cilët ende e kundërshtojnë ardhjen e tij në krye të ekipit. 

Benitez erdhi në nëntor si zëvendësim për të larguarin Roberto Di Matteo, ndërsa tifozët asnjëherë nuk e kanë përkrahur ardhjen e tij, duke mbajtur pankarta të ndryshme gjatë çdo ndeshjeje, ku bënin shaka dhe e ofendonin trajnerin. 

“Do ta lë Chelsean në fund të stinorit. Tifozët nuk po na ndihmojnë. Po e dëmtojnë imazhin e klubit. Në vend se të na përkrahin, ata po humbin kohë duke shkruar parulla të ndryshme,” ka thënë Benitez i frustruar pas fitores në FA Cup. 

“Ata po i bëjnë presion edhe lojtarëve, e mos të harrojnë se ndoshta kështu do t’iu ik Liga e Kampionëve stinorin tjetër,” ka thënë Benitez, që në një mënyrë u ka thënë ‘boll’ tifozëve për mospërkrahjen. 

Pasi që Chelsea mposhti Middlesbrough-në mbrëmë, ka kaluar në çerekfinale të FA Cup, ku do të ndeshet me Manchester Unitedin.