FERONIKELI-DRENICA
Foto: arkiv/ S. Aliqkaj
Drenica befason Feronikelin, fiton derbin
1 April, 2017 @16:55
Drenica ka bërë befasinë e xhiros në Superligë. Edhepse shumica e ndeshjeve luhen nesër, kuqezinjtë nga Skenderaj kanë treguar se janë shumë të interesuar të mbesin në Superligë dhe sot kanë befasuar Feronikelin kampion, që po ndjek titullin e tretë kampion me radhë.
Pas pjesës së parë pa gola, Drenica e nisi me gol pjesën e dytë kur Armend Abazi shënoi për 0-1. Më pas Kreshnik Lushtaku shtoi epërsinë në 0-2.
Feronikeli u hodh me të gjitha forcat në sulm dhe shënoi përmes Mentor Zhdrellës për 1-2. Dominimin i kampionit vazhdonte, por ata lenin hapësira boshe prapa duke kërkuar të fitojnë pikë.
E këtë nuk e fali Lushtaku, që edhe në rastin tjetër që iu dha, shënoi për të vulosur fatin e takimit.
Me këtë fitore të Drenicës, kuqezinjtë e Skenderajit bën hap të madh për mbijetesë në Superligë, derisa Feronikeli nesër do të kuptojë a ka mbetur larg nga titulli, apo ka ende mundësi.
FAKT:
| Kjo ka qenë fitorja e parë e Drenicës ndaj Feronikelit këtë stinor. Në 2 ndeshjet e kaluara Feronikeli kishte mposhtur Drenicën në Superligë. |
