GJILAN
Pamje nga ndeshja e kaluar ndërmjet Ferronikelit dhe Dritës/ Foto: KF Ferronikeli
Drita ndal Ferronikelin
5 November, 2015 @14:52
Ferronikeli sot ka pasur rastin që t’u ikë përcjellësve në krye të tabelës me fitore ndaj Dritës, por gjilanasit nuk e kanë lejuar këtë.
Drita ka marrë epërsinë pas minutës së 30-të të lojës. Mesfushori Xhevdet Shabani ka goditur gjuajtjen e lirë dhe e ka gjetur Alban Shillovën në zonë, që ka shënuar me kokë në portën e Granit Kolshit.
Para golit, Xhevdet Shabani kishte dy raste për të shënuar, ndërsa Ferronikeli kishte rrezikuar në fillim të ndeshjes përmes Mendurim Hotit, por u ndalë nga portieri Artan Latifi.
Fillimi i pjesës së dytë pa një kampion më të avancuar në zonën e gjilanasve. Së pari Fidan Gërbeshi shënoi një gol që u anulua nga referi anësor për shkak të ofsjadit, ndërsa në minutën e 65-të të ndeshjes, pas një asistimi të Mentor Zhdrellës, Përparim Livoreka shënoi në portën e Latifit për të barazuar shifrat.
Tentimet e mëvonshme të të dyja skuadrave nuk sollën gol, derisa Drita tundi rrjetën nga pozita jashtë loje dhe qëlloi shtyllën e Kolshit. Në fund, barazimi bën Ferronikelin që të ketë 3 pikë më shumë se ndjekësi i parë, Trepça’89, ndërsa Drita del mbi Drenicën në klasifikim.
