Dritë evropiane, bindshëm ndaj Inter Turkut dhe kalim tutje

Një paraqitje maestrale e Dritës është parë në Fadil Vokrri sonte, derisa të përzgjedhurit e Ardian Nuhiut kanë parakaluar shpejtë e në dukje edhe letë ndaj Inter Turkut finlandez, duke përmbysur rezultatin e ndeshjes së parë për të fituar në Prishtinë 3-0 [Marko Simonovski 2, Arbnor Muja 49, 51].

Drita ishte mposhtur në ndeshjen e parë 1-0 në Finlandë, në javën e kaluar.

Sonte, një nismë e shpejtë dhe gol i shpejtë, që erdhi nga një depërtim i Arbnor Mujës në formë, ndërsa Marko Simonovski topin e shtyer e shutoi shpejt në portë për epërsi.

Gjilanasit vazhduan me dominim, që u vërejt edhe në statistikat e pasndeshjes, ndërsa Muja i ardhur në stinorin e kaluar nga Trepça’89 për 80 mijë euro të përfolura si dëmshpërblim, çoi skuadrën tutje, duke shënuar dy herë shpejtë në pjesë të dytë.

Së pari Muja qëlloi shtyllën, ndërsa topin e rikthyer e çoi në portë për 2-0 (49). Nuk vonoi, mitrovicasi mori topin në zonë dhe qëlloi saktë për 3-0 (51) përfundimtare.

Derisa finlandezët e çorientuar nuk arrinin të bënin më shumë, Drita deri në fund qëlloi edhe një herë shtyllën që mohoi fitoren edhe më të thellë të tyre. 

Nënkampionja e Kosovës tash në rrethin e dytë kualifikues për Ligë të Kampionëve ndeshet me ekipin e njohur belg, Antwerpen, ndërsa duelet luhen më 21 e 28 korrik.

Drita, në paraqitjen e saj të katërt evropiane, asnjëherë nuk ka dështuar te kundërshtari i parë evropian. Kësaj radhe ndaj Inter Turkut me rezultat të përgjithshëm nga dy ndeshjet, 3-1.