“Duhet të japim 200% nga vetja”

Menaxheri i ekipit kombëtar, Alban Bushi, ka dhënë një intervistë për faqen zyrtare të Federatës Shqiptare të Futbollit, në lidhje me shortin e eliminatoreve të Europianit, Franca 2016.

Siç dihej, Shqipëria do të jetë në grupin I, ku do të përballet me Portugalinë, Danimarkën, Serbinë dhe Armeninë.

Më poshtë mund ta lexoni intervistën e plotë të Alban Bushit, si dhe ta shikoni videon e intervistës së tij.

“Unë mendoj që është njëri nga shortet më të vështira që i ka rënë ndonjëherë Shqipërisë në historinë e saj. Por mendoj që do të ketë surpriza. Nuk është se ne jemi dorëzuar me rënien e shortit. Është një short i vështirë por edhe i kalueshëm. Mendoj që do të ketë surpriza.”

─ Çfarë duhet të kemi kujdes në mënyrë që të marrim maksimumin enga ky turne eliminator?

“Si vend i vogël që jemi, si ekip modest që jemi, duhet me dhënë maksimumin 200% në çdo ndeshje. Nëse do që ta rrahësh Portugalinë, Danimarkën, Serbinë dhe Armeninë, në qoftë se nuk jep 200% për ndeshje, ti nuk i rreh dot ata. Në qoftë se ata janë mobilizuar 70% dhe ti je njësoj me ata 70%, atëherë çdo gjë është e humbur. Mendoj që do të mobilizohemi 200% dhe i kemi të gjitha shansat.”

─ Portugalia, Danimarka e pastaj Serbia dhe Armenia janë të gjithë njësoj të vështira?

“Mendoj që të gjitha janë njësoj. Sidomos kjo e fundit, Armenia, është nga më të rrezikshmet për mendimin tim, sepse janë shumë të etur dhe në çdo ndeshje vlerësojnë maksimalisht. Pavarësisht se Portugalia ka një ekip që edhe mund të tolerojnë gjatë ndeshjes me kuptimin e mirë të fjalës tolerim, që nuk përqëndrojnë 100% sepse kanë lojtarë të mëdhenj, kurse Armenia kemi parë në sezonin e kaluar që gjithë lojtarët japin maksimumin dhe janë shumë të rrezikshëm, sidomos jashtë fushës së tyre.”

─ Mendoni se e kemi grupin e lojtarëve për të përballuar me sukses një edicion të tillë?

“Unë mendoj që kualitete kemi shumë, por lojtarë nuk është se kemi shumë. Janë pothuajse tetë ndeshje dhe dy me Francën që janë tani konkrete, i bie dhjetë ndeshje. Grupi i lojtarëve nuk është aq sa duhet të jetë për një edicion, por mendoj se me pak kujdes, sidomos në marrjen e kartonëve do të jemi pak më të kujdesshëm, mendoj që do t’ia kalojmë.”

Video