Misioni, Shqipëria në europian

Trajneri italian i kombëtares shqiptare në futboll, Gianni De Biasi, duke folur për portalin sportiv italian Tutto Mercato, mes tjerash ka treguar se e tërë detyra e tij me kuqezinjtë është që t’i dërgojë ata në Kampionat Europian, Franca 2016. 

“Qëllimi im i vetëm është shkuarja në Kampionat Europian me Shqipërinë. Edhepse kemi rënë në një grup të çmendur, nuk do të thotë se nuk jemi të kujdesshëm,” ka thënë italiani 56 vjeçar. 

Ai më tej i është përgjigjur pyetjeve edhe lidhur me rrezikun e largimit të lojtarëve nga reprezentacioni i Shqipërisë në atë të Kosovës, por ky fakt nuk e brengos shumë italianin, siç shprehej ai. 

Kosova, ndër më të fortat në Europë

Derisa në pyetjen se si e sheh dhe pritet të jetë Kosova, italiani është shprehur që mund të bëhet ndër më të fortat aktualisht në Europë. 

“Nëse do të kishte aftësi për të tërhequr të gjithë lojtarët e shpërndarë në botë, pjesë e kombëtareve të ndryshme, si për shembull Shaqiri, Kosova mund të jetë njëra ndër ekipet më të forta europiane,” mendon De Biasi.