Duka në udhëkryq, në 3 stadiume pritet titulli i kampionit

Kryetari i FSHF-së, Armand Duka, do të jetë në udhëkryq këtë të mërkurë. Për titull të kampionit në Kategorinë Superiore janë ende në garë 4 skuadra, derisa xhiroja e fundit e stinorit (36) zhvillohet të mërkurën prej orës 17:00.

Teuta është lidere me 63 pikë, e ndjekur nga Vllaznia me 63, Partizani me 62 dhe Laçi me 61. Të gjitha skuadrat kanë gjasa për tu bërë kampion i sezonit 202/21.

E KE i FSHF-së ka vendosur që për ceremoninë e titullit dhe trofetë të bëhen gati tri stadiumet ku zhvillohen ndeshjet që do të mund të përcaktojnë kampionin: Ballsh, Shkodër dhe Durrës.

Ndërsa Armand Duka, kryetar, do të pret fundin e ndeshjeve të kampionatit për tu nisur drejt qytetit ku do të festojë kampioni i ri i Shqipërisë për t’ia dorëzuar trofeun e titullit kampion.

“Duke parë se 90 minuta përpara fundit të sezonit në garë për titullin kampion janë katër skuadra, Komiteti Ekzekutiv vendosi organizimin e 3 ceremonive, në Ballsh, Durrës dhe Shkodër. Në të tre qytetet do të jetë trofeu i kampionit, zyrtarë të lartë të Federatës Shqiptare të Futbollit, ndërkohë që Presidenti Duka i cili do të dorëzojë trofeun, do të udhëtojë drejt stadiumit ku do të dorëzohet titulli menjëherë pas përfundimit të lojës së rregullt,” ka shkruar FSHF-ja në njoftimin e botuar sot në faqen zyrtare të Federatës.

Duelet e xhiros së fundit në Superiore janë (e mërkurë, 26.05.2021):

Kukësi-Kastrioti
Bylis-Partizani
Vllaznia-Laçi
Teuta-Apolonia
Tirana-Skenderbeu

TABELA AKTUALE:

1. Teuta 63p (kampion dhe UCL)
-
2. Vllaznia 63p (nënkampion dhe UECL)
3. Partizani 62p (UECL)
-
4. Laçi 61p
5. Tirana 55p
6. Kukësi 45p
7. Skenderbeu 37p
-
8. Kastrioti 32p (barazh)
-
9. Bylis 31p (rënie nga liga)
10. Apolonia 21p (rënie nga liga)

info: *në kllapa është arritja për pozitën, sipas renditjes, që mund të ndërrojë pas ndeshjeve të fundit të stinorit