Duro: Vendosën diferencat e vogla, duhet t’ia japim dorën Dritës për fitore

Trajneri i Feronikelit, Klodian Duro, ka dhënë deklaratë pas ndeshjes përballë Dritës, e cila përfundoi me rezultat 3-1 në të mirë të skuadrës kundërshtare.

RAPORTI I NDESHJES

Trajneri Duro në deklaratën e tij tha se ndeshjen e vendosën diferencat e vogla dhe kualiteteti i ekipit kundërshtar.

“Ne e nisëm mirë lojën dhe e humbëm një rast kur mund ta çonim rezultatin në 0-1, ndërsa më pas diferencat janë të vogla sepse në momentin që kur presësh që të dalësh ti në avantazh, kundërshtari kalon në avantazh me një penallti. Pastaj ne vazhduam të luajmë mirë, por përsëri duhej që të rrijmë në fund dhe të bëjmë ekstra taktika që ta përballojmë këtë kundërshtar që është më i fortë në taktika si klub, si staf dhe si futbollistë në fushë. Para këtyre fakteve nuk na mbetet tjetër gjë përveçse të japim dorën dhe të urojmë për këtë sukses”, tha Duro për Art Sport.

Më tej ai foli edhe për gjendjen jo të kënaqshme të Feronikelit në tabelë.

“Ky ekip nuk meriton të jetë këtu. Sigurisht që ne do të bëjmë të pamundurën që me meritë të plotë të jemi pjesë e Superligës. Por me këta faktorë, me këtë ligë dhe me këto komponente që të gjithë i shohin, normalisht që çdo ekip mund të gjendet në këtë gjendje”, përfundoi ai.