FLAMURTARI - LLAPI
E treta humbje e Llapit, Flamurtari në zonën e barazhit
3 March, 2018 @14:55
Një fillim i stinorit pranveror aspak i mirë për skuadrën e Llapit.
Skuadra e Tahir Batatinës sot e ka pësuar humbjen e tretë me radhë në Superligë, për ta bërë kështu edhe një hap prapa në luftën për titullin kampion.
Në një fushë jo fort të përshtatshme për lojë, Llapi u mposht me rezultat 2-1 nga skuadra e Flamurtarit, për të cilën kjo është fitorja e tretë sezonale.
Të parët në epërsi kaluan llapjanët në minutën e 15’ me golin e Dardan Jasharit, i cili shënoi me kokë, ndërsa vendasit reaguan shpejt në minutat 39’ e 41’, për ta rikthyer ndeshjen në anën e tyre. Mendez shënoi fillimisht për 1-1, ndërsa i njëjti lojtar asistoi te Alban Shillova për shifrat 2-1.
Në pjesën e dytë, Llapi provoi që me zëvendësime ofansive të ndryshojë diçka, mirëpo gola të tjerë nuk pati dhe takimi u mbyll me fitoren e vendasve.
Fitorja e sotme bën që Flamurtari tashmë të largohet nga vendi i parafundit dhe të ngjitet në zonën e barazhit, kurse 3 humbjet e Llapit në 3 ndeshjet e para të pranverës e mbajnë këtë skuadër 5 pikë larg kreut momentalisht.
