FFK e pakënaqur me vendimin e organeve disiplinore të UEFA-së!

Federata e Futbollit e Koosvës (FFK) ka reaguar sot pasi që ka kuptuar dënimin e Komisionit Disiplinor (KD) të UEFA-së ndaj Federatës së Futbollit të Rumanisë (FRF). Me të kuptuar gjobat dhe ndalesat, FFK ka lëshuar një reagim, ku ka shprehur pakënaqësinë e saj me vendimin e organeve disiplinore të UEFA-së.

REAGIMI I FFK-së:

“Federata e Futbollit e Kosovës shpreh pakënaqësinë e saj në lidhje me vendimin e organeve disiplinore të UEFA-s për të dënuar Federatën e Futbollit të Rumanisë me 52 mijë euro dhe një ndeshje pa shikues.

FFK-ja do të vazhdojë rrugën e saj ligjore dhe do të paraqesë ankesë në trupat përkatëse të UEFA-s, duke kërkuar që dënimi ndaj Federatës së Futbollit të Rumanisë të jetë sa më i lartë i mundshëm, jo vetëm në aspektin financiar, por edhe në forma të tjera, në mënyrë që të shërbejë si shembull se UEFA nuk do të tolerojë në asnjë mënyrë ofendime të tilla raciste ndaj një Federate anëtare të saj dhe ndaj një shteti të njohur ndërkombëtarisht.

FFK-ja është e përkushtuar që të kërkojë nga UEFA, që nëpërmjet dënimeve ndaj Federatës së Rumanisë t’ia bëjë të qartë çdo federate, grupi tifozësh apo çfarëdo grupi tjetër të interesit, se shteti i Kosovës, ekipi kombëtar i Kosovës dhe Federata e Futbollit e Kosovës, duhet të trajtohen dhe të respektohen në të njëjtën formë me çdo shtet, ekip kombëtar, e Federatë tjetër evropiane që është anëtare e UEFA-s.”