Finalja e Kupës, sot

Pasditja e sotme do të bëj të ditur fituesin e ri të Kupës së Kosovës. Vetëm disa ditë pasi që shpëtoi nga rënia, Ferronikeli, ka mundësi që të ngrit trofe! 

Skuadra e Ramiz Krasniqit që mposhti Gjilanin vetëm pas penalltive në ndeshjen e barazhit dhe siguroi Superligën edhe për një stinor tjetër, tashmë mund të përfundojë stinorin me trofe - në rast të fitores sot. 

Në anën tjetër, ekipi i ri i Hajvalisë, që ka pasur një ngritje rapide nëpër ligat e Kosovës për të arritur në Superligë, me cilësinë e lojtarëve që ka në dispozicion - mund t’ia sjellë pronarëve të saj të pasur - trofeun e parë në histori të klubit. 

Kjo është finalja e parë për të dyja skuadrat, derisa vetëm disa ish lojtarë të Lirisë dhe të Hysit që luajnë për këto skuadra kanë fituar ndonjëherë këtë trofe. 

Sa i përket tifozërive, FFK-ja ka ndarë me short që ata të Ferronikelin të qëndrojnë në Lindje të stadiumit, derisa të Hajvalisë në Perëndim.