Fitore për sportin, humbje për politikën

Izolimi shumë vjeçar i padrejtë i futbollit kosovar, nesër pritet të marr fund.

Federata e Futbollit e Kosovës synon të bëhet anëtarja e 55-të e organizatës më të madhe europiane të futbollit, UEFA.

UEFA-ja nesër do ta ketë Kongresin e saj në kryeqytetin e Hungarisë, Budapest, ku njëra prej temave kryesore do të jetë edhe çështja e Kosovës.

Për pranimin e Kosovës, UEFA do ta ndërrojë statutin e saj, me ç‘rast do të mundësohet votimi për pranimin e Kosovës me të drejta të plota në UEFA.

Deri më tani, pengesa kryesore e mos pranimit të Kosovës ka qenë njëra prej pikave në statutin e UEFA-së, ku thuhet se anëtare e kësaj organizate mund të bëhen vetëm ato shtete që pavarësia e tyre është e njohur nga OKB-ja (Organizata e Kombeve të Bashkuara).

Kjo pikë, e cila në fakt ka karakter politik, do të ndërrohet duke e zëvendësuar me fjalinë “anëtare e UEFA-së mund të bëhen ato shtete që pavarësia e tyre është njohur nga shumica e shteteve ndërkombëtare në kontinentin europian”.

Ky ndryshim, njëkohësisht edhe do të jetë fitorja më e madhe e sportit, karshi politikës.

Me këtë, edhe do të hapen dyert për votim që Kosova të pranohet në UEFA, pasi të pranohet aplikacioni për FFK-së për pranim.

Në votim, Kosovës i duhet shumica e thjeshtë e votave, pra mbi 50%, që do të thotë së paku 28 vota pro për pranim.

Në rast të përfundimit me sukses të procesit të votimit në UEFA, vetëm 10 ditë më vonë, në Kongresin e FIFA-së në Meksikë, Kosova do të hyjë përsëri në votim për pranim edhe në këtë organizatë.

Gjithsesi, pranimi në FIFA shikohet më shumë si çështje procedurale, pasi kjo e fundit është treguar e gatshme për ta pranuar Kosovës, gjithmonë pas pranimit në UEFA.

Pas kësaj, Kosova do t’i bashkohet edhe kampanjës për kualifikim në Kampionatin Botëror për vitin 2018 që do të mbahet në Rusi.

E për këtë, vendi i Kosovës tashmë është i rezervuar në Grupin I, së bashku me Kroacinë, Finlandën, Islandën, Turqinë dhe Ukrainën.

Gjithashtu, edhe ekipet kosovare do ta marrin dritën jeshile për të garuar në garat europiane si Liga e Kampionëve dhe Europa League.

Në Ligën e Kampionëve do të merr pjesë kampioni i Kosovës nga faza e tretë kualifikuese, kurse në Europa League nënkampioni dhe fituesi i Kupës së Kosovës.