FSHF merr arsyetimin nga UEFA për dënimin

UEFA ka dërguar arsyetimin e saj për dënimin e dhënë ndaj Shqipërisë, në ndeshjen Serbi-Shqipëri. 

Sipas burimeve të Panorama Online pranë Federatës Shqiptare të Futbollit në dokumentin e mbërritur nga UEFA-ja në Tiranë thuhet që: 

“Shqipëria ka humbur ndeshjen 3-0 ndaj Serbisë në tavolinë për shkak të refuzimit të kthimit në fushë pas trazirave, derisa gjoba prej 100 mijë eurove është dhënë për fluturaken me flamur të Shqipërisë së Madhe.” 

FSHF pritet të reagojë për vendimin e UEFA-së brenda 5 ditëve nga marrja e arsyetimit nga shtëpia e futbollit europian. 

Ndërkaq, FSHF në njoftimin e saj zyrtar ka bërë të ditur se do të shpalos argumentimin e UEFA-së dhe përgjigjen e saj pas konferencës për shtyp të Gianni De Biasit nesër në zyret e saja.