Genc Hamiti në kohën shtesë, Liria mposhtet nga Drenica

Në takimin e zhvilluar në ‘Riza Lushta’ të Mitrovicës, kjo për shkak se ‘Bajram Aliu’ nuk ishte në gjendje të volitshme për lojë për shkak të kushteve atmosferike, Drenica ka arritur ta mposhtë në çastet e fundit skuadrën e Lirisë.

Fillimisht Liria rrezikoi përmes Basriut, i cili tentoi të shënojë me kokë, ndërsa rasti i dytë i ndeshjes erdhi nga Hysen Tahiri i vendasve, i cili provoi ta befasojë portierin Bakaj, mirëpo goditja e tij ishte e pasuksesshme. Në minutën e 35’ të ndeshjes, Liria e gjeti golin, mirëpo ishte gjyqtari anësor ai që e mohoi epërsinë e prizrenasve për shkak se goli erdhi nga një pozicion jashtë loje. Kjo ishte e tëra sa i përket pjesës së parë.

TABELA AKTUALE SUPERLIGA

Në pjesën e dytë, Liria u ringjall pak pas inkuadrimit të Zenel Gavazajt, mirëpo më të mirë në pjesën e dytë ishin vendasit, të cilët e kërkuan golin deri në fund dhe kjo iu shpërblye, me Genc Hamitin që shënoi në minutën e tretë të lojës shtesë, për t’ia dhuruar kështu 3 pikë të arta Drenicës.

Ky rezultat, që i konvenon më tepër Drenicës, bën që edhe Liria edhe Drenica ta mbyllin sezonin vjeshtor me nga 28 pikë të tubuara.