I gatshëm për Bayernin

Uellsiani 100 milionësh, Gareth Bale, që mungoi në ndeshjen e fundjavës për Real Madridin, në fitoren ndaj Osasunës, ka deklaruar sonte se është i gatshëm për Bayernin në Ligë të Kampionëve. 

“Jam mirë. Kam qenë edhe në stërvitje. Shpresoj të luaj nesër. Jemi gati të japim 100%, ngase ende nuk e ndjej se jemi kualifikuar në finale,” është cituar të ketë thënë Bale nga mediat spanjolle në konferencën për shtyp para ndeshjes së kthimit ndaj Bayern Munchen në gjysmëfinale të Ligës së Kampionëve. 

Real Madrid fitoi ndeshjen e parë 1-0 në Santiago Bernabeu javën që shkoi dhe është duke e kërkuar titullin e dhjetë europian, apo siç thonë spanjollët, La Decima. 

Bale, nuk u paraqit në fundjavë ngase ishte ftohur pak dhe trajneri i Realit, Carlo Ancelotti, nuk kishte dashur të rrezikojë shëndetin e tij. 

Real Madrid është duke e ndjekur edhe titullin e kampionit të Spanjës përveç asaj të Europës, pas fitores së Copa del Rey.