Ia nisim me minus 10 pikë!

Sigal Prishtina ka zhvilluar stërvitjet në palestrën e Kozuvit në Gjevgjeli, para ndeshjes së nesërme që përcakton finalistin e Balkan League-së. 

Përkundër epërsisë së madhe që kanë arritur në ndeshjen e parë, trajneri i Prishtinës, Marjan Ilievski, u ka porositur lojtarëve që nesër t’ia nisin ndeshjes sikur të jenë 10 pikë në disavantazh! 

“Nesër nuk jemi në plus 24 pikë, por minus 10. Ky parket duhet të ngritet lartë nga ju nesër. Jemi një hap larg finales dhe ëndrra e secilit nga këtu është e njejtë. ëndrra e secilit nga qytetarët e Prishtinës dhe Plisave që nuk janë me ne është që të kthehemi të kualifikuar në finale. Nesër duhet të luajmë me zemër, për Prishtinën, për Plisat,” u ka thënë Ilievski pas stërvitjeve basketbollistëvë, ka bërë të ditur faqja zyrtare e Prishtinës në Facebook. 

Prishtina kishte demoluar Kozuvin në ndeshjen e parë të zhvilluar në Pallatin e Rinisë dhe të Sporteve në kryeqytetin tonë, ndërsa nesër kërkon finalen e ligës ballkanike, që do të jetë historike për një ekip nga Kosova.