PAS NDESHJES
Idrizi fajëson gjyqtarët për humbjen
27 February, 2021 @16:29
Kryetrajneri i Trepçës ‘89, Shpëtim Idrizi, ka fajësuar gjyqtarët e ndeshjes për humbjen e sotme ndaj Prishtinës, ku ekipi i tij pësoi me golin e prishtinasve në minutën shtesë.
Idrizi tha se mënyra e ndarjes së drejtësisë ishte tendencioze dhe përcaktuese për rezultatin e ndeshjes.
“Përpara se të flas për rrjedhën e lojës, dua që të ndalem te çështje e mënyrës së ndarjes së drejtësisë, e cila ishte tejet tendencioze dhe përcaktuese për rezultatin final të ndeshjes. Futbollisti i Prishtinës, Alban Shillova e meritoi kartonin e dytë të verdhë, ndërkohë gjyqtari heshti sepse po shikonte ngjyrat e fanellës. Ai më pas u zëvendësua nga trajneri i Prishtinës, sepse e dinte se e meritoi karton të kuq. Sa i përket ndeshjes, i përgëzoj futbollistët për angazhimin dhe disiplinën. Pavarësisht rezultatit në fundin e ndeshjes unë jam i kënaqur me futbollistët e mi në lidhje me atë që treguan”, tha Idrizi.