Kukësi europian

Vetëm 12 muaj më parë Kukësi ishte duke festuar arritjen në Kategorinë Superiore shqiptare. Por tani, pas një viti, pasi që përfunduan në vendin e dytë të elitës shqiptare, ata do të finalizojnë rritjen e tyre meteorike me paraqitje në Europa League. 

Kukësianët, që në radhët e tyre kanë edhe një numër të konsiderueshëm të futbollistëve nga Superliga e Kosovës do të takohen të enjten me skuadrën estoneze, Flora nga Talini. 

“Do të jemi gati. Nuk do të jetë lehtë por do të provojmë. Kemi pasur stërvitje të mira në përgatitjet tona dyjavore në Ohër dhe e vetmja brengë për momentin është ritmi i ekipit,” ka thënë trajneri i kukësianëve, Armando Cungu për uefa.com. 

Kjo do të jetë paraqitja e parë europiane për skuadrën nga veriu i Shqipërisë, që do të kurorëzojë ngritjen e shpejtë të kësaj skuadre si forcë e re e futbollit shqiptar. 

“Kemi ekip të mirë, kemi futbollistë liderë dhe shumë lojtarë që kanë luajtur më parë në Europë. Jemi gati,” ka thënë Sulejman Starova, zyrtar i klubit të Kukësit, që në dekadat e fundit ka pasur përvojë europiane si futbollist, trajner dhe menaxher. 

Kukësi ka qenë ekipi i vetëm në Shqipëri që nuk ka humbur asnjë ndeshje si vendas stinorin e kaluar. Mirëpo, ndeshjet europiane do të duhet t’i luaj në Qemal Stafa të Tiranës, e jo në Zeqir Ymerin e pamposhtur. 

“Të mos luajmë në Kukës do të jetë e vështirë, por me siguri që do të kemi përkrahjen e tifozëve tanë. Duhet të paraqitemi sa më mirë në Estoni dhe pastaj në ndeshjen e dytë të kemi gjasa më të mëdha për kualifikim,” ka thënë kryetari i klubit premtues shqiptar, Safet Gjici për faqen zyrtare të UEFA-së tre ditë para paraqitjes së parë europiane të klubit që e menaxhon ai.