Kuqezinjtë nisin stërvitjet para Francës e Italisë

Përfaqësuesja e Shqipërisë do të nis nesër përgatitjet për miqësoret ndaj Francës dhe Italisë. 

Në njoftimin e botuar nga Federata Shqiptare e Futbollit, është bërë e ditur se djelmoshat kuqezinj do të jenë në dispozicion të Gianni De Biasit nesër dhe pasnesër në stërvitje, që nis nga ora 17:30. 

Për më tepër, këto stërvitje do të jenë të hapura edhe për mediat, derisa të mërkurën në mesditë kapiteni i kombëtares shqiptare, Lorik Cana, bashkë me trajnerin italian të kuqezinjëve, De Biasi, do të mbajnë një konferencë për shtyp - para udhëtimit në Francë. 

Shqipëria gjatë muajit nëntor nuk do të ketë ndeshje kualifikuese por do të zhvillojë dy miqësore, me ekipet e mëdha të kontinentit të vjetër - Francën dhe Italinë. 

Ndeshja me Francën do të luhet më 14, derisa ajo me Italinë më 18 nëntor.