Kush është rivali i Shqipërisë?!

Ata janë nga vendi ku sportet dimërore janë të popullarizuara, ndërsa futbolli nuk është edhe aq i popullarizuar.

Por gjenerata që po drejtohet nga zvicerani Marcel Koller, ka bërë që Austria të jetë njëra ndër skuadrat e pakta që ka kaluar kualifikimet për EURO 2016 pa asnjë humbje.

Nëse s’ju kujtohet, Austria ka dalë si e para nga Grupi G kualifikues, duke lënë pas Rusinë e Suedinë.

Ata tash kërkojnë të befasojnë edhe në EURO 2016, ndërsa gjenden në Grupin F me rivalë si Portugalia, Islanda dhe Hungaria.

Përbërja e ekipit

Me yjet e pakontestueshme në ekip si David Alaba i Bayern Munchenit dhe Marko Arnautovic i Stoke Cityt, ata në të vërtetë në përbërje kanë lojtarë punëtorë që s’falin para portës kundërshtare dhe mbrohen me mish e shpirt.

Christian Fuchs, Marc Janko, Sebastian Prodl, Martin Harnik e Zlatko Junuzovic, janë vetëm disa nga emrat austriake. 

Gjatë gjithë fazës kualifikuese nga 10 ndeshje ata kanë pësuar vetëm 5 gola në portën e tyre, ndërsa kanë dhënë 22 gola.

“Kemi treguar gjatë kualifikimeve se jemi ekip i zhvilluar si duhet. Tash, pas një pauze shumë të gjatë nga sukseset historike, ka ardhur koha që të flasim për suksese dhe do të qëndrojmë si rrezik për çdo kundërshtar,” kanë qenë fjalët e Kollerit para miqësores me Shqipërinë, që zhvillohet më 26 dhe Turqisë, që zhvillohet më 29 mars.

Ekipi është pritur nga afro 2 mijë e 500 adhurues gjatë grumbullimit të parë, ndërsa lojtarët kanë qenë në ditë relaksi dhe kjo u shihej nga fytyra.

Pse Shqipëria e Turqia?!

Sepse Shqipëria është ekip i vetëm që e ka mposhtur Portugalinë në kualifikime. E Portugalia është bartës i Grupit F në EURO 2016 ku bën pjesë edhe Austria.

E njejta politikë, edhe ndaj turqve, që është njëri ndër dy ekipet që kanë arritur ta mposhtin Islandën në kualifikime. E Islanda, është rival i Austrisë në Grupin F.

Kjo është hera e parë që Austria është kualifikuar me lojë në një Kampionat Europian, EURO 2016. Ata vetëm edhe njëherë kanë qenë pjesë e europianit, në EURO 2008, kur kanë qenë bashkorganizator me Zvicrën.