Në EURO 2016 shkojmë për surpriza

Sulmuesi në formë i kombëtares shqiptare, Sokol Cikalleshi, në konferencën e sotme për shtyp, foli për dy miqësoret e radhës si dhe për kampionatin europian ku do të jetë pjesëmarrëse edhe Shqipëria.

Cikalleshi fillimisht u shpreh i lumtur për formën e tij aktuale në Turqi, derisa për miqësoren kundër Austrisë tha se do të luajnë për rezultat pozitiv. 

“Jam i lumtur për minutat që kam luajtur në Turqi. Tani jemi këtu për kombëtaren, edhe pse miqësoret janë të rëndësishme për ato që kërkon trajneri. Ndaj Austrisë shpresojmë të bëjmë një rezultat pozitiv. Loja dhe rezultati janë të dyja të rëndësishme. Jemi në moment historik dhe do përpiqemi të bëjmë maksimumin. Në finalet e EURO 2016 ndeshjet janë të vështira, por ne do shkojmë të bëjmë surpriza,” tha Cikalleshi.

Shqipëria me Austrinë do të përballet më 26 mars, ndërsa vetëm tre ditë më vonë për kundërshtar do ta ketë Luksemburgun.