Liverpool pajtohet, Shaqiri drejt Lyonit

Lyon, që ende s’ka shënuar asnjë fitore në Ligue 1 edhe pas tri xhirove të zhvilluara, pritet që të këndellet me ardhjen e zviceranit me origjinë nga Kosova, Xherdan Shaqiri.

Sipas BBC Sport, Liverpool është pajtuar të pranojë 12 milionë euro nga ekipi francez, që sot u ndalë nga sulmuesi i Kosovës Elbasan Rashani, për t’ia dhënë Shaqirin.

Futbollisti 29-vjeçar që kishte ardhur te Liverpool në vitin 2018 ka pasur një EURO 2020 shumë të mirë këtë verë, ndërsa në stinorin e kaluar ka nisur vetëm në pesë ndeshje të Premier Ligës nën drejtimin e Jurgen Kloppit.

Ish-futbollisti i Interit dhe Bayernit ka fituar Ligën e Kampionëve dhe titullin kampion në Angli me Liverpoolin përgjatë viteve sa qëndroi aty.

Ai bëhet lojtari i dytë i Liverpoolit që largohet nga klubi për të qenë pjesë e Ligue 1, pas holandezit Georginio Wijnaldum që shkoi drejt PSG-së.