MENTOR ZHDRELLA
Llapi sot zyrtarizoi Zhdrellën
14 July, 2017 @10:17
Mesfushori i shumë ekipeve kosovare dhe katër herë lojtari më i mirë i Kosovës, shpallur nga FFK, Mentor Zhdrella, edhe zyrtarisht prej këtij momenti është lojtar i ri i Llapit të Podujevës.
Njoftimin e djeshëm për nënshkrimin e kontratës mes lojtarit në fjalë dhe kryetarit të klubit llapjan, e ka zyrtarizuar edhe vetë klubi në faqen zyrtare të ekipit, duke i uruar mirëseardhje Zhdrellës me përvojë.
Zhdrella në vitet e fundit ka qenë pjesë e ish-kampionit të Kosovës, Feronikeli, ndërsa tash e tutje do të veshë fanellën bardhekaltër të Llapit, që stinorin e shkuar arriti finalen e Kupës së Kosovës për herë të parë në histori të klubit, ndërsa përfundoi në pozitën e tretë.
Përndryshe Mentori që në stinorin e kaluar ka qenë i lënduar me muaj, ka arritur të shënojë 5 gola për Feronikelin, duke treguar se nuk e ka harruar specialitetin e tij nga gjuajtjet e lira, ku shpesh ka rrezikuar portat kundërshtare.
