Miqësoret për Kosovën, lejohen nga FIFA!

FIFA do të pranojë që Kosova të jetë anëtari i saj më i ri me të drejta të kufizuara. Kosova që prej 10 janarit të vitit në prag do të lejohet që luajë ndeshje miqësore ndërkombëtare. 

Një burim i televizionit Klan Kosova i afërt me bisedimet FFK-FIFA-FSS i ka thënë këtij televizioni se kjo punë është e kryer 99.9%. 

Ndërsa trajneri i përfaqësueses kosovare, Albert Bunjaki, në një bisedë telefonike me këtë televizion ka thënë se nuk është në dijeni për një zhvillim të tillë, mirëpo këtë gjë  në një mënyrë e ka konfirmuar edhe Serbia në të përditshmen e saj Blic. 

“FIFA nga 10 janari do t’i jep leje zyrtare Kosovës që të luajë ndeshje miqësore ndërkombëtare, por pa simbole shtetërore, derisa mysafiri i parë në Prishtinë do të jetë siç është paralajmëruar reprezentacioni kroat,” shkruan e përditshmja Blic në faqen e saj në internet. 

“Deshëm apo jo, gjërat po shkojnë në atë drejtim. Kosova pritet të luaj pa simbole shtetërore, ndërsa hap pas hapi ata do të pranohen në Kombet e Bashkuara dhe do të kenë të drejta të plota. Sa i përket kësaj, Serbia po shkon drejt Europës, pa marrë parasysh gjërat tjera, sikurse që thonë politikanët, ne nuk do ta pranojmë Kosovën asnjëherë si shtet të pavarur - por ata do të luajnë futboll,” ka thënë Dusan Marevic, anëtar i mëparshëm i Komisioneve të ndryshme në FIFA e UEFA për Blicin.