Nagelsmann përgjigjet lidhur me spekulimet për Bayernin

Pas eliminimit të mbrëmshëm të Bayernit nga Liga e Kampionëve dhe përfoljeve të sotme se trajneri aktual i Bayernit Hansi Flick do të bëhet përzgjedhës i kombëtares gjermane — kanë filluar menjëherë spekulimet se trajneri aktual i Leipzigut Julian Nagelsmann mund të merr drejtimin e klubit bavarez.

Mirëpo, Nagelsmann ka mohuar menjëherë këto spekulime, duke i quajtur të pavërteta. Ish-reprezentuesi gjerman, Lothar Matthaus ka thënë se Nagelsmann është në bisedime me Bayernin për të zëvendësuar Flickun në largim.

Sidoqoftë, Nagelsmann ka qenë i qartë sot.

“Nuk ka pasur asnjë bisedë mes meje dhe Bayernit. Nuk e kam idenë se prej nga Lothar ka marrë këtë informacion. Natyrisht që këtë mund ta konfirmojnë edhe agjentët e mi. As ata nuk kanë pasur kontakte fare me Bayernin për këtë punë,” ka thënë Nagelsmann 33-vjeçar.