Natë dëshpëruese për ekipet shqiptare

Garat e Europa Ligës nuk kanë qenë të suksesshme për ekipet shqiptare sonte.

Përveç Shkupit që u mposht nga Glasgow Rangers dhe Luftëtarit të Gjirokastrës që u mposht nga Ventspils, disfatë kanë pësuar sonte edhe Partizani i Tiranës dhe Laçi.

Partizani u mposht në Selman Stërmasi të Tiranës nga ekipi i Mariborit të Sllovenisë me rezultat minimal 0-1.

Golin e vetëm dhe të fitores për ekipin slloven e shënoi Gregor Bajde në minutën e 50-të, ndërsa tentimet e Partizanit, që aktualisht drejtohet nga Skender Gega, ishin të pamjaftueshme për së paku barazim.

Labinot Ibrahimi luajti 90 minuta për Partizanin, ndërsa Esat Mala 74 minuta.

Në anën tjetër, ekipi i Laçit, i drejtuar nga Besnik Prenga u mposht nga Anorthosisi i Qipros me rezultat 2-1, përkundër se kishte epërsi 0-1 në fillim të ndeshjes kur Erjon Hoxhallari kishte shënuar për epërsi.

Gjithsesi, ky rezultat është i mirë për Laçin që javën tjetër do të kërkojë kualifikimin në raundin e dytë të garave kualifikuese të Europa Ligës.

Nga të gjitha ekipet shqiptare, në këtë xhiro të Europa Ligës, vetëm Prishtina ka nxjerrë barazim. Bardhekaltërit nga kryeqyteti i Kosovës barazuan pa gola ndaj Fola Eschit të Luksemburgut dje.