Ndërrimet e trajnerëve në Superligë

Stinori i ri i Superligës së Kosovës që nisi në mes të gushtit 2013 nisi me 12 trajnerë që kishin qëllime të ndryshme me ekipet e tyre. 

Sot vetëm 7 muaj më pas, vetëm Afrim Tovërlani i Prishtinës dhe Ismet Munishi i Llamkos Kosovës, duke mos llogaritur këtu Fadil Ademin e Hysit që u shua, kanë mbetur në postet e tyre. 

Me dorëheqjen e trajnerit të Drenicës, Afrim Jashari, pas humbjes nga Ferronikeli në fundjavë, që prishi serinë e 13-të ndeshjeve pa humbje për kuqezinjtë e Skenderajit, Superliga shpejtë do të mësojë trajnerin e 25-të të saj këtë stinor! (duke llogaritur këtu edhe trajnerin e përkohshëm të Ferizajit). 

Kampionë të ndërrimit të trajnerëve këtë stinor janë Trepça’89, Trepça, Hajvalia, Drita dhe Fushë Kosova, të cilëve iu bashkua edhe Drenica që do të emërojë sot ose nesër trajnerin e tretë të stinorit 2013/14. 

Skuadrat tjera kanë ndërruar së paku nga një trajner dhe kanë ende në detyrë të dytin derisa siç u tha edhe më lartë, Llamkos Kosova lidere dhe Prishtina kampione aktuale - vazhdojnë ende me ata që e nisën stinorin. 

Drenica pritet të emërojë në postin e trajnerit Mehmet Mehmetin, por ende nuk është konfirmuar zyrtarisht kjo gjë nga klubi kuqezi që gjindet në pozitën e pestë të Superligës.