Neymar dhe fituesit tjerë

Kalimi i Neymarit tek PSG për 222 milionë euro nuk lëndon askënd pos krejt futbollin në përgjithësi. Të gjithë ata që nuk janë të prekur direkt nga ky transaksion, janë ata që lëndohen. As vetë Neymari, as babai i tij i dënuar në Spanjë, as PSG, e as Barcelona nuk humbin nga ky transaksion.

50 milionë euro rrogë në vit në total për Neymarin. Pos kësaj, liderllëku aq shumë i kërkuar nga ai në një ekip ku është për shumë nivele më poshtë se tjerët sa i përket popullaritetit. Për talentin dhe kontributin në fushë, si fizik si psikik, tek PSG ka edhe lojtarë tjerë që i afrohen e edhe e tejkalojnë brazilianin.

Ky është rast i përkryer për kapitenin e Brazilit. Do të dilte nga hija e Messit dhe do të kishte të gjitha ato që i gëzon argjentinasi tashmë sa vite tek Barcelona – një ekip i plotë që luajnë për të! Është një sprovë, një risk, i cili marrë parasysh përfitimet materiale ia vlen për t’u provuar.

PSG humb 222 milionë euro tek Barcelona. Është humbja e dytë më e thellë brenda vitit që do të pësoj nga katalunasit. Shto edhe pagën për Neymarin dhe arrin gati në gjysmë miliardi dollarë. Por, pa marrë parasysh titujt eventual të Ligës së Kampionëve, Neymari do të bëj PSG brend botëror – gjë që kanë aspiruar që nga blerja e këtij ekipi Khelaffët.

Fatkeqsisht, sot më shumë kanë rëndësi dollarët se sa titujt e fituar në fushë. Në këtë aspekt, PSG është fituesi më i madh.

E në këtë aspekt Barcelona humbën më së shumti. Por, jo aq shumë sa fiton PSG. Spanjollët vazhdojnë të mbesin ekip me renome global. Kanë ende Messin, por për dyfish më pak kohëzgjatje se sa karriera e Neymarit. Kur jemi tek Neymar, dyshoj që do të përfundoj karrierën në PSG.

Barcelona me 222 milionë eurot e inkasuara dhe dhjetëra milionë të kursyer në paga, mund të transferoj së paku dy talente. Talente të vërteta, jo sikur këto që ka transferuar viteve të fundit. Duhet të pranojmë që Barcelona ka dështuar në freskimin e ekipit. Lojtarët që vijnë janë shumë të vegjël për të mbathur këpucët e lëna bosh nga Xavi, Iniesta, e tani edhe Neymar. Ky i fundit është ndoshta më së lehti për t’u zëvendësuar.

Akademia nuk po prodhon më lojtarë dhe është mision i vështirë të nxjerrësh dy super-gjenerata një pas një. Por, transferimet që po i bëjnë nuk po janë të mençura – Mathieu, Gomes, Paco, Arda, e lista vazhdon.

Si emra që mund të zëvendësojnë Neymarin përmenden Coutinho, Dybala, Di Maria dhe Dembele. Personalisht, Dembele besoj që është më i miri nga të gjithë këta. Gjithashtu do të përshtatet si krahë sulmi, derisa dy të parët janë më shumë si mesfushorë qendror. Coutinho dhe Dybala janë edhe më kokëfortë se Dembele. Për Di Marian as mos të flasim. Nuk ka kontinuitet, e edhe nuk jam i sigurt që ndonjë argjentinas do të përshtatej me Messin aty.

Aprovimi i Messit do të jetë vendimtar se kush do të vije në Barcelonë. Mendoj që Dybala ka gjasat më të mëdha. Nuk besoj që asnjëri do të ishte më i mirë se Dembele. Por, e di që të gjithë – Neymar, PSG, Barcelona kanë përfituar nga ky transferim. Edhe ekipet që do t’i shesin Barcelonës do të fitojnë.

Vetëm futbolli ka humbur. Përsëri këtë verë.