Ofertat për Pogban drejtë shifrave magjike

Lufta për ta transferuar yllin e Juventusit, Paul Pogba, ka filluar të ashpërsohet.

Drejtuesit e Manchester Cityt, të cilët e kërkojnë me ngulm mesfushorin françez, kanë dërguar ofertë të re te skuadra e Juventusit, njofton e përditshmja The Sun.

Kjo ka ndodhur si rrjedhojë e interesimit të Barcelonës, pasi gjatë javës drejtori Ariedo Braida dhe presidenti Josep Bartomeu, konfirmuan interesimin e tyre për dinamon e mesfushës së Zonjës së Vjetër.

The Sun bëri të ditur se oferta e re e Manchester Cityt është 82.9 milionë euro, ndryshe nga oferta e mëparshme që ishte rreth 80 milionë euro (sipas La Gazzetta dello Sport).

Agjenti i Pogbas e ka vlerësuar kartonin e futbollistit 100 milionë euro, ndërsa ofertat e skuadrave të interesuara dita ditës po i afrohen kësaj shifre magjike.

Sido që të jetë, Juventus mbetet e interesuar që ta mbajë në skuadër Pogban, derisa është duke u treguar më i gatshëm për ta shitur mesfushorin tjetër, Arturo Vidal, i cili po kërkohet nga Arsenali dhe Manchester Unitedi.