Prishtina prezenton Elshanin

Qemail Elshani, përforcimi i ri i Prishtinës i transferuar nga Ferronikeli, sot është prezentuar para mediave, përkrah nënkryetarit të klubit, Afrim Muciqit, drejtorit të përgjithshëm, Sokol Krasniqit dhe kryetrajnerit, Sami Sermaxhaj.

Mesfushori ofansiv nga Drenasi në fakt para këtij prezentimi e kishte shijuar ndjenjën e të qenit “prishtinas”, pasi në miqësoren e luajtur të dielën kundër Gjilanit, ishte paraqitur në fushë për 20 minuta.

Futbollisti 24 vjeçar para se të nënshkruante me Prishtinën, kishte arritur marrëveshje me skuadrën tiranase, Partizani, mirëpo më pas për shkak të mosmarrëveshjeve ndërmjet ekipit të kuq dhe futbollistit, bashkëpunimi ndërmjet tyre përfundoi shumë shpejtë.

”Çështja me Partizanin i kalon së kaluarës dhe mendoj se do ta zgjidh më vonë. Tani jam te Prishtina dhe mendimet e mija janë vetëm bardh e kaltër. Me punën që jemi duke e bërë dhe me komponimin e skuadrës gjithçka është e mundur. Objektivat tona janë Kupa dhe pjesa sa më e lartë në tabelë,” ka thënë Elshani me rastin e prezentimit të tij, transmeton faqja zyrtare e klubit bardhekaltër.

Elshani gjatë pjesës vjeshtore të kampionatit ka qenë njëri ndër lojtarët kryesor te Ferronikeli, pasi që ishte paraqitur titullar në të gjitha ndeshjet kampionale, ndërsa ka arritur t’i tund portat kundërshtare dy herë.