PSG pret përgjigjen e Mbappés

Sipas raportimeve të L’Equipe, Kylian Mbappé ka vonuar vendimin e tij për rinovimin e kontratës me PSG-në.

Drejtori sportiv i Paris Saint Germain, Leonardo, dy javë më parë kishte theksuar se telenovela do të zgjidhej së shpejti, por deri më tani asgjë nuk ka të re.

Parisienët janë në nxitim pasi lojtarit i përfundon kontrata në vitin 2022 dhe në rast të një përgjigjeje negative, ata do të duhej të përpiqen ta shesin atë me çmimin më të lartë të mundshëm, çmim që do të ishte rreth 200 milionë euro.

Për këtë arsye, PSG dëshiron ta mbyllë çështjen qysh para çerekfinaleve të Ligës së Kampionëve.

Trajneri i PSG-së, Mauricio Pochettino dhe drejtuesit e klubit, e kanë lavdëruar lojtarin sa herë që janë paraqitur para mediave, duke e bërë të qartë se futbollisti është shumë i rëndësishëm për ekipin.

Për futbollistin i cili mund të jetë i lirë pas 16 muajsh, kanë shprehur interesim shumë ekipe, përfshirë edhe galaktikët e Real Madrid.