LEONARD MEKAJ
Rahoveci zyrtarizon asistuesin më të mirë vendor të Superligës
31 July, 2019 @8:17
Pa një, pa dy, Rahoveci mbrëmë ka zyrtarizuar me dy video të lëshuara një pas një në Facebook, përforcimin e ri të skuadrës.
Leonard Mekaj 24 vjeç është playmakeri i ri i Rahovecit. Basketbollisti pejan që së fundi ka qenë pjesë e rivalit të Rahovecit, Ylli, tash e tutje do të ketë përkrahjen e vreshtarëve në ndeshje.
Mekaj përgjatë stinorit 2018/19 me Yllin pati regjistruar 10.7 pikë për ndeshje, 8 asistime për ndeshje dhe 3.1 kërcime për ndeshje. Organizatori pejan ka përfunduar stinorin si asistuesi i dytë më i mirë i Superligës 2018/19. Mesatare më të mirë se Mekaj ka pasur vetëm Mark Dorris i Trepçës.
Përndryshe 24 vjeçari është pjesë e rregullt e reprezentacionit të Kosovës qe sa kohë dhe ka përvojë edhe në ndeshje ndërkombëtare, prej kur ka qenë pjesë e Pejës dhe Prishtinës.
Rahoveci kështu ka bërë përforcimin e parë të ri vendor këtë stinor, pas zyrtarizimit të Jure Gunjinas nga Kroacia.