Rashkaj do të luaj kundër Turqisë

Megjithëse është thënë se përfaqësuesja e Kosovës nuk do të mund të ndihmohet nga lojtari më i mirë i ndeshjes me Haitin dhe kapitenin e saj, Anel Rashkajn, një gjë e tillë nuk do të ndodh.

Organizatori i mesfushës kosovare do të jetë pjesë e ekipit përfaqësues për ndeshjen e 21 majit kundër Turqisë, por jo edhe për ndeshjen kundër Senegalit që luhet me 25 maj.

Rashkaj, së bashku me Mehmet Hetemaj e Lum Rexhepi, do të duhet të kthehen në skuadrat e tyre përkatëse, pasi që datat e ndeshjeve kur do të luaj Kosova nuk janë data të lira nga FIFA dhe futbollistët në fjalë kanë arritur të marrin leje nga klubet e tyre vetëm për ndeshjen me Turqinë.