Reali një hap larg Superkupës

Pas triumfit në Superkupën e Evropës ndaj Manchester Unitedit, Real Madridi sonte i është afruar edhe Superkupës së Spanjës.

Ndeshja e zhvilluar sonte në ‘Camp Nou’ përfundoi 1-3 në të mirë të madrilenëve, rezultat ky që i jep epërsi të konsiderueshme skuadrës së francezit Zidane në ndeshjen e kthimit që luhet në ‘Santiago Bernabeu’ të mërkurën e ardhshme.

Pjesa e parë u mbyll pa gola, ndërsa epërsia e Realit erdhi nga një autogol i spanjollit Pique. Më pas, Messi barazoi nga penalltia, penallti që u fitua nga Luis Suarez dhe që ishte tejet e dyshimtë, ndërsa më pas epërsinë e Realit e riktheu Cristiano Ronaldo, i inkuadruar nga banka rezervë, me një supergol. I njëjti lojtar u përjashtua nga loja pas 2 kartonëve të verdhë shumë pak minuta pas golit të shënuar. Kartonin e parë të verdhë Ronaldo e mori për heqjen e fanellës kur e shënoi golin, ndërsa të dytin për shkak të një ‘simulimi’, gjithnjë sipas gjyqtarit kryesor të ndeshjes.

Sulmet e Barcelonës për ta barazuar rezultatin vazhduan, mirëpo ndodhi krejt e kundërta. Reali e gjeti golin përmes një kundërsulmi fantastik. Ishte i inkudruari tjetër nga banka rezervë, Asensio, ai që e gjeti rrjetën me një super goditje me këmbën e majtë dhe ndeshja u mbyll me rezultat 1-3.

Ndeshjen e kthimit Reali e nis me një epërsi të konsiderueshme, ndërsa Barcelonës për ta fituar këtë trofe i duhet një super paraqitje në Madrid.

1-3 FC Barcelona vs Real Madrid - All Goals… by replayvostfr