Rusia then akullin!

Përmballja e dy ekipeve të dështuara, Rusisë dhe Turqisë, e nxorri fitues skuadrën ruse, e cila triumfoi me rezultat 77-89, duke e thelluar epërsinë kryesisht në çerekun e fundit.

Sergey Karasev ishte i shkëlqyeshëm në fitoren e parë të rusëve. Ai shënoi 25 pikë e 5 kërcime, kurse tek turqit më i miri ishte Oguz Savas me 18 pikë, derisa Kerem Gonlum e përmbylli takimin me një pikë më pak.

Kjo ishte ndeshja përshëndetëse për të dy skuadrat, pasi që më parë i kishin humbur gjasat për kualifikim në fazën e dytë në Eurobasket.

Mali Zi e mposht Serbinë

Në duelin ndërmjet dy shteteve fqinjë fitues doli Mali i Zi, i cili e mposhti Serbinë me rezultat 83-76.

Qendra serbe Rasko Katic luajti me 19 pikë, ndërsa lojtari kryesor i serbve, Nenad Krstic, nuk u mundua shumë në këtë ndeshje dhe mbeti vetëm rreth 8 minuta në fushë, pasi që ekipi i tij e kishte siguruar kualifikimin më parë dhe kjo ndeshje nuk kishte shumë rëndësi.

Për skuadrën fituese më i dalluari ishte përsëri plejmekeri amerikan Tyrese Rice, i cili realizoi 12 pikë, 2 kërcime dhe 4 asistime.

Polonia bën sefte!

Sikurse Rusia, edhe Polonia shënoi fitoren e parë, dhe atë në ndeshjen e fundit të saj.

Polakët e mposhtën nikoqirin e kampionatit, Slloveninë, me rezultat 61-71.

Thomas Kelati i polakëve ishte koshashënuesi më i mirë i këtij dueli me 21 pikë, derisa bashkëkombasi i tij, qendra Marcin Gortat realizoi double-double me 19 pikë e 12 kërcime.

Te skuadra nikoqire 13 pikët e Domen Lorbek dolën të jenë të pamjaftueshëm për fitore.

Franca si në stërvitje

Franca nuk kishte aspak problem për ta mposhtur Belgjikën. Nën patronatin e Tony Parker, i cili luajti me 20 pikë, françezët shënuan fitore me rezultat 65-82.

Parker u ndihmua nga 21 vjeçari Joffrey Lauvergne (14) dhe Mickael Gelabale, kurse te belget u dallua Axel Hervelle me 13 pikë.

Rezultatet e ndeshjeve