Shkëndija në rrethin e dytë

Skuadra e parë shqiptare që ka arritur ta kalojë rrethin e parë kualifikues në Europa League, është Shkëndija.

Tetovarët, pas kanë shënuar fitore të thellë prej 4-0 në udhëtim, duke triumfuar me plot meritë dhe arritën të kualifikohen në rrethin e dytë me rezultat të përgjithshëm 7-0, pasi që në ndeshjen e parë patën fituar me rezultat 3-0.

Shkëndija ishte dominuese në ndeshje gjatë gjithë kohës, derisa golin e epërsisë e arriti në minutën 32’ të shënuar nga Armend Alimi pas një kundërsulmi të shpejt.

Punët për Shkëndijën u lehtësuan në minutën 37’, kur sulmuesi i Dacias, Oleg Andronic, u ndëshkua me kartonin e dytë të verdhë dhe më pas edhe me të kuqin.

Golashënuesi i golit të parë, Alimi, ishte asistues për golin e dytë, që u shënua nga braziliani Stenio Junior në minutën 44’, e që e përcaktoi edhe rezultatin e pjesës së parë.

Në pjesën e dytë Shkëndija e uli ritmin e lojës, por jo edhe numrin e golave, pasi që së pari talenti 18 vjeçar Arbin Zejnulai dhe më pas kapiteni Ferhan Hasani që shënoi nga penalltia shënuan për fitoren e thellë të Shkëndijës.

Në rrethin e dytë Shkëndija do të luajë me fituesin e duelit HJK (Finlandë) - Connah’s Quay (Uells), ndërsa kjo e fundit e ka epërsinë prej 1-0 nga ndeshja e parë.