Shqiptarët barazojnë në Ligë të Kampionëve

Sulmuesi 24 vjeçar, Agim Ibraimi, me skuadrën e tij Maribor ka arritur të nxjerrë barazim si mysafir në Qipro ndaj APOEL-it. 

Ibraimi, ka qenë pjesë e përbërjes së parë të ekipit të tij dhe ka qenë në përbërje deri në minutën e 70-të, kur u desht që të zëvendësohej për shkak të taktikës së trajnerit të ekipit slloven, pasi që Maribor kishte arritur barazimin ndaj qipriotëve të papërshtatshëm, 1-1

Shqiptari tjetër që sonte u paraqit me ekipin e tij në xhiron e tretë kualifikuese të Ligës së Kampionëve, Valon Berisha, është dashur që të kënaqet me barazim ndaj Fenerbahçes. 

Berisha 20 vjeçar, i cili është edhe anëtar i kombëtares norvegjeze është futur në lojë në minutën e 80-të të takimit dhe ndikimi i tij në lojë ka qenë mesatar. Red Bull Salzburgu i Berishës ka pranuar gol në minutën e fundit shtesë të takimit pas penalltisë të cilën e realizoi braziliani i Fenerbahçes, Christian Baroni, për rezultatin përfundimtar 1-1.  

Ndeshjet e kthimit luhen mesjavën e ardhshme. Derisa Ibraimi me Mariborin pritet të kalojnë më lehtë në Play-Off të Ligës së Kampionëve, Berisha do të ketë punë të vështirë në Stamboll ndaj Fenerbahçes.